Plantun de Prouvènço

Pèr coumpara dos planto d'encò nostre

Rumex cristatus & Athyrium filix-femina

Rumex cristatus

Polygonaceae

Noms en français : Patience à crêtes, Rumex à crêtes.

Descripcioun :
Aquesto paciènci es uno grando erbo di làrgi fueio en cor à la baso emé d'enflourejado longo e denso. Es uno planto que nous vèn di Balkan. Se recounèis bonodi si valvo tant larjo que longo (5 à 8 x 5 à 8 mm) e qu'an uno pichoto cresto.

Usanço :
Li fueio de la paciènci-à-cresto soun acampado e manjado dins soun pais d'óurigino (Grèço, Sicilo, Turquìo...). Jouino, li fueio podon èstre manjado cruso, mai pu vièio, soun proun amaro e li fau faire bouli (poussible emé de la). Ramentan que faudrié pas trop n'en manja malodi l'acide óussali.

Port : Grando erbo
Taio : 0,6 à 1,2(2) m
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Rumex
Famiho : Polygonaceae

Ordre : Caryophyllales

Coulour de la flour : Verdo
Petalo : 3
Ø (o loungour) flour : 4 mm
Flourido : Printèms

Sòu : Ca
Autour basso e auto : Pancaro entresigna
Aparado : Noun

Liò : Ribiero - Ermas - Camin
Estànci : Mesoumediterran
Couroulougi : Óurigino mediterranenco-Nord-Ouèst
Ref. sc. : Rumex cristatus DC., 1813

Féuse(-feméu)

Athyrium filix-femina

Athyriaceae

Nom en français : Fougère femelle.

Descripcioun :
Aquest féuse trachis sus siliço e au nostre se rescountro subretout en mountagno souto li mele e li sapino. Douno proun d'èr au féuse-de-cabro, Dryopteris filix-mas, mai li foundo soun eici tres cop descoupado e subretout emé de soro en long e noun pas en round. L'indusìo se vèi bèn.

Usanço :
Lis indian d'Americo n'en manjavon lou rizoumo pela e rousti. Aurié d'ùni prouprieta en raport emé li règlo e l'acouchamen, d'ounte lou noum.